മഹാഭാരതം മൂലം/ഭീഷ്മപർവം/അധ്യായം66

മഹാഭാരതം മൂലം/ഭീഷ്മപർവം
രചന:വ്യാസൻ
അധ്യായം66

1 [സ്]
     അകരോത് തുമുലം യുദ്ധം ഭീഷ്മഃ ശാന്തനവസ് തദാ
     ഭീമസേന ഭയാദ് ഇച്ഛൻ പുത്രാംസ് താരയിതും തവ
2 പൂർവാഹ്ണേ തൻ മഹാരൗദ്രം രാജ്ഞാം യുദ്ധം അവർതത
     കുരൂണാം പാണ്ഡവാനാം ച മുഖ്യശൂര വിനാശനം
3 തസ്മിന്ന് ആകുലസംഗ്രാമേ വർതമാനേ മഹാഭയേ
     അഭവത് തുമുലഃ ശബ്ദഃ സംസ്പൃശൻ ഗഗനം മഹത്
4 നദദ്ഭിശ് ച മഹാനാഗൈർ ഹേഷമാണൈശ് ച വാജിഭിഃ
     ഭേരീശംഖനിനാദൈശ് ച തുമുലഃ സമപദ്യത
5 യുയുത്സവസ് തേ വിക്രാന്താ വിജയായ മഹാബലാഃ
     അന്യോന്യം അഭിഗർജന്തോ ഗോഷ്ഠേഷ്വ് ഇവ മഹർഷഭാഃ
6 ശിരസാം പാത്യമാനാനാം സമരേ നിശിതൈഃ ശരൈഃ
     അശ്മവൃഷ്ടിർ ഇവാകാശേ ബഭൂവ ഭരതർഷഭ
7 കുണ്ഡലോഷ്ണീഷ ധാരീണി ജാതരൂപോജ്ജ്വലാനി ച
     പതിതാനി സ്മ ദൃശ്യന്തേ ശിരാംസി ഭരതർഷഭ
8 വിശിഖോന്മഥിതൈർ ഗാത്രൈർ ബാഹുഭിശ് ച സ കാർമുകൈഃ
     സ ഹസ്താഭരണൈശ് ചാന്യൈർ അഭവച് ഛാദിതാ മഹീ
9 കവചോപഹിതൈർ ഗാത്രൈർ ഹസ്തൈശ് ച സമലങ്കൃതൈഃ
     മുഖൈശ് ച ചന്ദ്രസങ്കാശൈ രക്താന്തനയനൈഃ ശുഭൈഃ
10 ഗജവാജിമനുഷ്യാണാം സർവഗാത്രൈശ് ച ഭൂപതേ
    ആസീത് സർവാ സമാകീർണാ മുഹൂർതേന വസുന്ധരാ
11 രജോമേഘൈശ് ച തുമുലൈഃ ശസ്ത്രവിദ്യുത് പ്രകാശിതൈഃ
    ആയുധാനാം ച നിർഘോഷഃ സ്തനയിത്നുസമോ ഽഭവത്
12 സ സമ്പ്രഹാരസ് തുമുലഃ കടുകഃ ശോണിതോദകഃ
    പ്രാവർതത കുരൂണാം ച പാണ്ഡവാനാം ച ഭാരത
13 തസ്മിൻ മഹാഭയേ ഘോരേ തുമുലേ ലോമഹർഷണേ
    വവർഷുഃ ശരവർഷാണി ക്ഷത്രിയാ യുദ്ധദുർമദാഃ
14 ക്രോശന്തി കുഞ്ജരാസ് തത്ര ശരവർഷ പ്രതാപിതാഃ
    താവകാനാം പരേഷാം ച സംയുഗേ ഭരതോത്തമ
    അശ്വാശ് ച പര്യധാവന്ത ഹതാരോഹാ ദിശോ ദശ
15 ഉത്പത്യ നിപതന്ത്യ് അന്യേ ശരഘാത പ്രപീഡിതാഃ
    താവകാനാം പരേഷാം ച യോധാനാം ഭരതർഷഭ
16 അശ്വാനാം കുഞ്ജരാണാം ച രഥാനാം ചാതിവർതതാം
    സംഘാതാഃ സ്മ പ്രദൃശ്യന്തേ തത്ര തത്ര വിശാം പതേ
17 ഗദാഭിർ അസിഭിഃ പ്രാസൈർ ബാണൈശ് ച നതപർവഭിഃ
    ജഘ്നുഃ പരസ്പരം തത്ര ക്ഷത്രിയാഃ കാലചോദിതാഃ
18 അപരേ ബാഹുഭിർ വീരാ നിയുദ്ധ കുശലാ യുധി
    ബഹുധാ സമസജ്ജന്ത ആയസൈഃ പരിഘൈർ ഇവ
19 മുഷ്ടിഭിർ ജാനുഭിശ് ചൈവ തലൈശ് ചൈവ വിശാം പതേ
    അന്യോന്യം ജഘ്നിരേ വീരാസ് താവകാഃ പാണ്ഡവൈഃ സഹ
20 വിരഥാ രഥിനശ് ചാത്ര നിസ്ത്രിംശവരധാരിണഃ
    അന്യോന്യം അഭിധാവന്ത പരസ്പരവധൈഷിണഃ
21 തതോ ദുര്യോധനോ രാജാ കലിംഗൈർ ബഹുഭിർ വൃതഃ
    പുരസ്കൃത്യ രണേ ഭീഷ്മം പാണ്ഡവാൻ അഭ്യവർതത
22 തഥൈവ പാണ്ഡവാഃ സർവേ പരിവാര്യ വൃകോദരം
    ഭീഷ്മം അഭ്യദ്രവൻ ക്രുദ്ധാ രണേ രഭസ വാഹനാഃ