മഹാഭാരതം മൂലം/ഭീഷ്മപർവം/അധ്യായം105

മഹാഭാരതം മൂലം/ഭീഷ്മപർവം
രചന:വ്യാസൻ
അധ്യായം105

1 [ധൃ]
     കഥം ശിഖണ്ഡീ ഗാംഗേയം അഭ്യധാവത് പിതാമഹം
     പാഞ്ചാല്യഃ സമരേ ക്രുദ്ധോ ധർമാത്മാനം യതവ്രതം
2 കേ ഽരക്ഷൻ പാണ്ഡവാനീകേ ശിഖണ്ഡിനം ഉദായുധം
     ത്വരമാണാസ് ത്വരാ കാലേ ജിഗീഷന്തോ മഹാരഥാഃ
3 കഥം ശാന്തനവോ ഭീഷ്മഃ സ തസ്മിൻ ദമശേ ഽഹനി
     അയുധ്യത മഹാവീര്യഃ പാണ്ഡവൈഃ സഹ സൃഞ്ജയൈഃ
4 ന മൃഷ്യാമി രണേ ഭീഷ്മം പ്രത്യുദ്യാതം ശിഖണ്ഡിനം
     കച് ചിൻ ന രഥഭംഗോ ഽസ്യ ധനുർ വാശീര്യതാസ്യതഃ
5 [സ്]
     നാശീര്യത ധനുസ് തസ്യ രഥഭംഗോ നചാപ്യ് അഭൂത്
     യുധ്യമാനസ്യ സംഗ്രാമേ ഭീഷ്മസ്യ ഭരതർഷഭ
     നിഘ്നതഃ സമരേ ശത്രൂഞ് ശരൈഃ സംനതപർവഭിഃ
6 അനേകശതസാഹസ്രാസ് താവകാനാം മഹാരഥാഃ
     രഥദന്തി ഗണാ രാജൻ ഹയാശ് ചൈവ സുസജ്ജിതാഃ
     അഭ്യവർതന്ത യുദ്ധായ പുരസ്കൃത്യ പിതാമഹം
7 യഥാപ്രതിജ്ഞം കൗരവ്യ സ ചാപി സമിതിഞ്ജയഃ
     പാർഥാനാം അകരോദ് ഭീഷ്മഃ സതതം സമിതിക്ഷയം
8 യുധ്യമാനം മഹേഷ്വാസം വിനിഘ്നന്തം പരാഞ് ശരൈഃ
     പാഞ്ചാലാഃ പാണ്ഡവൈഃ സാർധം സർവ ഏവാഭ്യവാരയൻ
9 ദശമേ ഽഹനി സമ്പ്രാപ്തേ തതാപ രിപുവാഹിനീം
     കീര്യമാണാം ശിതൈർ ബാണൈഃ ശതശോ ഽഥ സഹസ്രശഃ
10 ന ഹി ഭീഷ്മം മഹേഷ്വാസം പാണ്ഡവാഃ പാണ്ഡുപൂർവജ
    അശക്നുവൻ രണേ ജേതും പാശഹസ്തം ഇവാന്തകം
11 അഥോപായാൻ മഹാരാജ സവ്യസാചീ പരന്തപഃ
    ത്രാസയൻ രഥിനഃ സർവാൻ ബീഭത്സുർ അപരാജിതഃ
12 സിൻഹവദ് വിനദന്ന് ഉച്ചൈർ ധനുർജ്യാം വിക്ഷിപൻ മുഹുഃ
    ശരൗഘാൻ വിസൃജൻ പാർഥോ വ്യചരത് കാലവദ് രണേ
13 തസ്യ ശബ്ദേന വിത്രസ്താസ് താവകാ ഭരതർഷഭ
    സിംഹസ്യേവ മൃഗാ രാജൻ വ്യദ്രവന്ത മഹാഭയാത്
14 ജയന്തം പാണ്ഡവം ദൃഷ്ട്വാ ത്വത് സൈന്യം ചാഭിപീഡിതം
    ദുര്യോധനസ് തതോ ഭീഷ്മം അബ്രവീദ് ഭൃശപീഡിതഃ
15 ഏഷ പാണ്ഡുർ ഉതസ് താത ശ്വേതാശ്വഃ കൃഷ്ണസാരഥിഃ
    ദഹതേ മാമകാൻ സർവാൻ കൃഷ്ണ വർത്മേവ കാനനം
16 പശ്യ സൈന്യാനി ഗാംഗേയ ദ്രവമാണാനി സർവശഃ
    പാണ്ഡവേന യുധാം ശ്രേഷ്ഠ കാല്യമാനാനി സംയുഗേ
17 യഥാ പശുഗണാൻ ആലഃ സങ്കാലയതി കാനനേ
    തഥേദം മാമകം സൈന്യം കാല്യതേ ശത്രുതാപന
18 ധനഞ്ജയ ശരൈർ ഭഗ്നം ദ്രവമാണം ഇതസ് തതഃ
    ഭീമോ ഹ്യ് ഏഷ ദുരാധർഷോ വിദ്രാവയതി മേ ബലം
19 സാത്യകിശ് ചേകിതാനശ് ച മാദ്രീപുത്രൗ ച പാണ്ഡവൗ
    അഭിമന്യുശ് ച വിക്രാന്തോ വാഹിനീം ദഹതേ മമ
20 ധൃഷ്ടദ്യുമ്നസ് തഥാ ശൂരോ രാക്ഷസശ് ച ഘടോത്കചഃ
    വ്യദ്രാവയേതാം സഹസാ സൈന്യം മമ മഹാബലൗ
21 വധ്യമാനസ്യ സൈന്യസ്യ സർവൈർ ഏതൈർ മഹാബലൈഃ
    നാന്യാം ഗതിം പ്രപശ്യാമി സ്ഥാനേ യുദ്ധേ ച ഭാരത
22 ഋതേ ത്വാം പുരുഷവ്യാഘ്ര ദേവതുല്യപരാക്രമ
    പര്യാപ്തശ് ച ഭവാൻ ക്ഷിപ്രം പീഡിതാനാം ഗതിർ ഭവ
23 ഏവം ഉക്തോ മഹാരാജ പിതാ ദേവവ്രതസ് തവ
    ചിന്തയിത്വാ മുഹൂർതം തു കൃത്വാ നിശ്ചയം ആത്മനഃ
    തവ സന്ധരയൻ പുത്രം അബ്രവീച് ഛന്തനോഃ സുതഃ
24 ദുര്യോധന വിജാനീഹി സ്ഥിരോ ഭവ വിശാം പതേ
    പൂർവകാലം തവ മയാ പ്രതിജ്ഞാതം മഹാബല
25 ഹത്വാ ദശസഹസ്രാണി ക്ഷത്രിയാണാം മഹാത്മനാം
    സംഗ്രാമാദ് വ്യപയാതവ്യം ഏതത് കർമ മമാഹ്നികം
    ഇതി തത് കൃതവാംശ് ചാഹം യഥോക്തം ഭരതർഷഭ
26 അദ്യ ചാപി മഹത് കർമ പ്രകരിഷ്യേ മഹാഹവേ
    അഹം വാ നിഹതഃ ശിഷ്യേ ഹനിഷ്യേ വാദ്യ പാണ്ഡവാൻ
27 അദ്യ തേ പുരുഷവ്യാഘ്ര പ്രതിമോക്ഷ്യേ ഋണം മഹത്
    ഭർതൃപിണ്ഡ കൃതം രാജൻ നിഹതഃ പൃതനാ മുഖേ
28 ഇത്യ് ഉക്ത്വാ ഭരതശ്രേഷ്ഠഃ ക്ഷത്രിയാൻ പ്രതപഞ് ശരൈഃ
    ആസസാദ ദുരാധർഷഃ പാണ്ഡവാനാം അനീകിനീം
29 അനീകമധ്യേ തിഷ്ഠന്തം ഗാംഗേയം ഭരതർഷഭ
    ആശീവിഷം ഇവ ക്രുദ്ധം പാണ്ഡവാഃ പര്യവാരയൻ
30 ദശമേ ഽഹനി തസ്മിംസ് തു ദർശയഞ് ശക്തിം ആത്മനഃ
    രാജഞ് ശതസഹസ്രാണി സോ ഽവധീത് കുരുനന്ദന
31 പഞ്ചാലാനാം ച യേ ശ്രേഷ്ഠാ രാജപുത്രാ മഹാബലാഃ
    തേഷാം ആദത്ത തേജാംസി ജലം സൂര്യ ഇവാംശുഭിഃ
32 ഹത്വാ ദശസഹസ്രാണി കുഞ്ജരാണാം തരസ്വിനാം
    സാരോഹണാം മഹാരാജ ഹയാനാം ചായുതം പുനഃ
33 പൂർണേ ശതസഹസ്രേ ദ്വേ പദാതീനാം നരോത്തമഃ
    പ്രജജ്വാല രണേ ഭീഷ്മോ വിധൂമ ഇവ പാവകഃ
34 ന ചൈനം പാണ്ഡവേയാനാം കേ ചിച് ഛേകുർ നിരീക്ഷിതും
    ഉത്തരം മാർഗം ആസ്ഥായ തപന്തം ഇവ ഭാസ്കരം
35 തേ പാണ്ഡവേയാഃ സംരബ്ധാ മഹേഷ്വാസേന പീഡിതാഃ
    വധായാഭ്യദ്രവൻ ഭീഷ്മം സൃഞ്ജയാശ് ച മഹാരഥാഃ
36 സ യുധ്യമാനോ ബഹുഭിർ ഭീഷ്മഃ ശാന്തനവസ് തദാ
    അവകീർണോ മഹാബാഹുഃ ശൈലോ മേഘൈർ ഇവാസിതൈഃ
37 പുത്രാസ് തു തവ ഗാംഗേയം സമന്താത് പര്യവാരയൻ
    മഹത്യാ സേനയാ സാർധം തതോ യുദ്ധം അവർതത