മഹാഭാരതം മൂലം/ഉദ്യോഗപർവം/അധ്യായം41
| ←അധ്യായം40 | മഹാഭാരതം മൂലം/ഉദ്യോഗപർവം രചന: അധ്യായം41 |
അധ്യായം42→ |
1 [ധൃ]
അനുക്തം യദി തേ കിം ചിദ് വാചാ വിദുര വിദ്യതേ
തൻ മേ ശുശ്രൂഷവേ ബ്രൂഹി വിചിത്രാണി ഹി ഭാഷസേ
2 ധൃതരാഷ്ട്ര കുമാരോ വൈ യഃ പുരാണഃ സനാതനഃ
സനത്സുജാതഃ പ്രോവാച മൃത്യുർ നാസ്തീതി ഭാരത
3 സ തേ ഗുഹ്യാൻ പ്രകാശാംശ് ച സർവാൻ ഹൃദയസംശ്രയാൻ
പ്രവക്ഷ്യതി മഹാരാജ സർവബുദ്ധിമതാം വരഃ
4 കിം ത്വം ന വേദ തദ് ഭൂയോ യൻ മേ ബ്രൂയാത് സനാതനഃ
ത്വം ഏവ വിദുര ബ്രൂഹി പ്രജ്ഞാ ശേഷോ ഽസ്തി ചേത് തവ
5 ശൂദ്രയോനാവ് അഹം ജാതോ നാതോ ഽന്യദ് വക്തും ഉത്സഹേ
കുമാരസ്യ തു യാ ബുദ്ധിർ വേദ താം ശാശ്വതീം അഹം
6 ബ്രാഹ്മീം ഹി യോനിം ആപന്നഃ സുഗുഹ്യം അപി യോ വദേത്
ന തേന ഗർഹ്യോ ദേവാനാം തസ്മാദ് ഏതദ് ബ്രവീമി തേ
7 ബ്രവീഹി വിദുര ത്വം മേ പുരാണം തം സനാതനം
കഥം ഏതേന ദേഹേന സ്യാദ് ഇഹൈവ സമാഗമഃ
8 ചിന്തയാം ആസ വിദുരസ് തം ഋഷിം സംശിതവ്രതം
സ ച തച് ചിന്തിതം ജ്ഞാത്വാ ദർശയാം ആസ ഭാരത
9 സ ചൈനം പ്രതിജഗ്രാഹ വിധിദൃഷ്ടേന കർമണാ
സുഖോപവിഷ്ടം വിശ്രാന്തം അഥൈനം വിദുരോ ഽബ്രവീത്
10 ഭഗവൻ സംശയഃ കശ് ചിദ് ധൃതരാഷ്ട്രസ്യ മാനസേ
യോ ന ശക്യോ മയാ വക്തും തം അസ്മൈ വക്തും അർഹസി
യം ശ്രുത്വായം മനുഷ്യേന്ദ്രഃ സുഖദുഃഖാതിഗോ ഭവേത്
11 ലാഭാലാഭൗ പ്രിയ ദ്വേഷ്യൗ യഥൈനം ന ജരാന്തകൗ
വിഷഹേരൻ ഭയാമർഷൗ ക്ഷുത്പിപാസേ മദോദ്ഭവൗ
അരതിശ് ചൈവ തന്ദ്രീ ച കാമക്രോധൗ ക്ഷയോദയൗ