മഹാഭാരതം മൂലം/ആദിപർവം/അധ്യായം72

മഹാഭാരതം മൂലം/ആദിപർവം
രചന:വ്യാസൻ
അധ്യായം 72

1 [വ്]
     സമാവൃത്ത വ്രതം തം തു വിസൃഷ്ടം ഗുരുണാ തദാ
     പ്രസ്ഥിതം ത്രിദശാവാസം ദേവ യാന്യ് അബ്രവീദ് ഇദം
2 ഋഷേർ അംഗിരസഃ പൗത്ര വൃത്തേനാഭിജനേന ച
     ഭ്രാജസേ വിദ്യയാ ചൈവ തപസാ ച ദമേന ച
3 ഋഷിർ യഥാംഗിരാ മാന്യഃ പിതുർ മമ മഹായശാഃ
     തഥാ മാന്യശ് ച പൂജ്യശ് ച ഭൂയോ മമ ബൃഹസ്പതിഃ
4 ഏവം ജ്ഞാത്വാ വിജാനീഹി യദ് ബ്രവീമി തപോധന
     വ്രതസ്ഥേ നിയമോപേതേ യഥാ വർതാമ്യ് അഹം ത്വയി
5 സ സമാവൃത്ത വിദ്യോ മാം ഭക്താം ഭജിതും അർഹസി
     ഗൃഹാണ പാണിം വിധിവൻ മമ മന്ത്രപുരസ്കൃതം
6 [കച]
     പൂജ്യോ മാന്യശ് ച ഭഗവാൻ യഥാ തവ പിതാ മമ
     തഥാ ത്വം അനവദ്യാംഗി പൂജനീയതരാ മമ
7 ആത്മപ്രാണൈഃ പ്രിയതമാ ഭാർഗവസ്യ മഹാത്മനഃ
     ത്വം ഭദ്രേ ധർമതഃ പൂജ്യാ ഗുരുപുത്രീ സദാ മമ
8 യഥാ മമ ഗുരുർ നിത്യം മാന്യഃ ശുക്രഃ പിതാ തവ
     ദേവ യാനി തഥൈവ ത്വം നൈവം മാം വക്തും അർഹസി
9 [ദേവ്]
     ഗുരുപുത്രസ്യ പുത്രോ വൈ ന തു ത്വം അസി മേ പിതുഃ
     തസ്മാൻ മാന്യശ് ച പൂജ്യശ് ച മമാപി ത്വം ദ്വിജോത്തമ
10 അസുരൈർ ഹന്യമാനേ ച കച ത്വയി പുനഃ പുനഃ
    തദാ പ്രഭൃതി യാ പ്രീതിസ് താം ത്വം ഏവ സ്മരസ്വ മേ
11 സൗഹാർദേ ചാനുരാഗേ ച വേത്ഥ മേ ഭക്തിം ഉത്തമാം
    ന മാം അർഹസി ധർമജ്ഞ ത്യക്തും ഭക്താം അനാഗസം
12 [ക്]
    അനിയോജ്യേ നിയോഗേ മാം നിയുനക്ഷി ശുഭവ്രതേ
    പ്രസീദ സുഭ്രു ത്വം മഹ്യം ഗുരോർ ഗുരുതരീ ശുഭേ
13 യത്രോഷിതം വിശാലാക്ഷി ത്വയാ ചന്ദ്രനിഭാനനേ
    തത്രാഹം ഉഷിതോ ഭദ്രേ കുക്ഷൗ കാവ്യസ്യ ഭാമിനി
14 ഭഗിനീ ധർമതോ മേ ത്വം മൈവം വോചഃ ശുഭാനനേ
    സുഖം അസ്മ്യ് ഉഷിതോ ഭദ്രേ ന മന്യുർ വിദ്യതേ മമ
15 ആപൃച്ഛേ ത്വാം ഗമിഷ്യാമി ശിവം ആശംസ മേ പഥി
    അവിരോധേന ധർമസ്യ സ്മർതവ്യോ ഽസ്മി കഥാന്തരേ
    അപ്രമത്തോത്ഥിതാ നിത്യം ആരാധയ ഗുരും മമ
16 [ദേവ്]
    യദി മാം ധർമകാമാർഥേ പ്രത്യാഖ്യാസ്യസി ചോദിതഃ
    തതഃ കച ന തേ വിദ്യാ സിദ്ധിം ഏഷാ ഗമിഷ്യതി
17 [ക്]
    ഗുരുപുത്രീതി കൃത്വാഹം പ്രത്യാചക്ഷേ ന ദോഷതഃ
    ഗുരുണാ ചാഭ്യനുജ്ഞാതഃ കാമം ഏവം ശപസ്വ മാം
18 ആർഷം ധർമം ബ്രുവാണോ ഽഹം ദേവ യാനി യഥാ ത്വയാ
    ശപ്തോ നാർഹോ ഽസ്മി ശാപസ്യ കാമതോ ഽദ്യ ന ധർമതഃ
19 തസ്മാദ് ഭവത്യാ യഃ കാമോ ന തഥാ സ ഭവിഷ്യതി
    ഋഷിപുത്രോ ന തേ കശ് ചിജ് ജാതു പാണിം ഗ്രഹീഷ്യതി
20 ഫലിഷ്യതി ന തേ വിദ്യാ യത് ത്വം മാം ആത്ഥ തത് തഥാ
    അധ്യാപയിഷ്യാമി തു യം തസ്യ വിദ്യാ ഫലിഷ്യതി
21 [വ്]
    ഏവം ഉക്ത്വാ ദ്വിജശ്രേഷ്ഠോ ദേവ യാനീം കചസ് തദാ
    ത്രിദശേശാലയം ശീഘ്രം ജഗാമ ദ്വിജസത്തമഃ
22 തം ആഗതം അഭിപ്രേക്ഷ്യ ദേവാ ഇന്ദ്രപുരോഗമാഃ
    ബൃഹസ്പതിം സഭാജ്യേദം കചം ആഹുർ മുദാന്വിതാഃ
23 യത് ത്വം അസ്മദ്ധിതം കർമ ചകർഥ പരമാദ്ഭുതം
    ന തേ യശഃ പ്രണശിതാ ഭാഗഭാൻ നോ ഭവിഷ്യസി