മഹാഭാരതം മൂലം/ആദിപർവം/അധ്യായം70
| ←അധ്യായം69 | മഹാഭാരതം മൂലം/ആദിപർവം രചന: അധ്യായം 70 |
അധ്യായം71→ |
1 [വ്]
പ്രജാപതേസ് തു ദക്ഷസ്യ മനോർ വൈവസ്വതസ്യ ച
ഭരതസ്യ കുരോഃ പൂരോർ അജമീഢസ്യ ചാന്വയേ
2 യാദവാനാം ഇമം വംശം പൗരവാണാം ച സർവശഃ
തഥൈവ ഭാരതാനാം ച പുണ്യം സ്വസ്ത്യ് അയനം മഹത്
ധന്യം യശസ്യം ആയുഷ്യം കീർതയിഷ്യാമി തേ ഽനഘ
3 തേജോഭിർ ഉദിതാഃ സർവേ മഹർഷിസമതേജസഃ
ദശ പ്രചേതസഃ പുത്രാഃ സന്തഃ പൂർവജനാഃ സ്മൃതാഃ
മേഘജേനാഗ്നിനാ യേ തേ പൂർവം ദഗ്ധാ മഹൗജസഃ
4 തേഭ്യഃ പ്രാചേതസോ ജജ്ഞേ ദക്ഷോ ദക്ഷാദ് ഇമാഃ പ്രജാഃ
സംഭൂതാഃ പുരുഷവ്യാഘ്ര സ ഹി ലോകപിതാമഹഃ
5 വീരിണ്യാ സഹ സംഗമ്യ ദക്ഷഃ പ്രാചേതസോ മുനിഃ
ആത്മതുല്യാൻ അജനയത് സഹസ്രം സംശിതവ്രതാൻ
6 സഹസ്രസംഖ്യാൻ സമിതാൻ സുതാൻ ദക്ഷസ്യ നാരദഃ
മോക്ഷം അധ്യാപയാം ആസ സാംഖ്യജ്ഞാനം അനുത്തമം
7 തതഃ പഞ്ചാശതം കന്യാഃ പുത്രികാ അഭിസന്ദധേ
പ്രജാപതേഃ പ്രജാ ദക്ഷഃ സിസൃക്ഷുർ ജനമേജയ
8 ദദൗ സ ദശ ധർമായ കശ്യപായ ത്രയോദശ
കാലസ്യ നയനേ യുക്താഃ സപ്ത വിംശതിം ഇന്ദവേ
9 ത്രയോദശാനാം പത്നീനാം യാ തു ദാക്ഷായണീ വരാ
മാരീചഃ കശ്യപസ് തസ്യാം ആദിത്യാൻ സമജീജനത്
ഇന്ദ്രാദീൻ വീര്യസമ്പന്നാൻ വിവസ്വന്തം അഥാപി ച
10 വിവസ്വതഃ സുതോ ജജ്ഞേ യമോ വൈവസ്വതഃ പ്രഭുഃ
മാർതണ്ഡശ് ച യമസ്യാപി പുത്രോ രാജന്ന് അജായത
11 മാർതണ്ഡസ്യ മനുർ ധീമാൻ അജായത സുതഃ പ്രഭുഃ
മനോർ വംശോ മാനവാനാം തതോ ഽയം പ്രഥിതോ ഽഭവത്
ബ്രഹ്മക്ഷത്രാദയസ് തസ്മാൻ മനോർ ജാതാസ് തു മാനവാഃ
12 തത്രാഭവത് തദാ രാജൻ ബ്രഹ്മക്ഷത്രേണ സംഗതം
ബ്രാഹ്മണാ മാനവാസ് തേഷാം സാംഗം വേദം അദീധരൻ
13 വേനം ധൃഷ്ണും നരിഷ്യന്തം നാഭാഗേക്ഷ്വാകും ഏവ ച
കരൂഷം അഥ ശര്യാതിം തത്രൈവാത്രാഷ്ടമീം ഇലാം
14 പൃഷധ്ര നവമാൻ ആഹുഃ ക്ഷത്രധർമപരായണാൻ
നാഭാഗാരിഷ്ട ദശമാൻ മനോഃ പുത്രാൻ മഹാബലാൻ
15 പഞ്ചാശതം മനോഃ പുത്രാസ് തഥൈവാന്യേ ഽഭവൻ ക്ഷിതൗ
അന്യോന്യഭേദാത് തേ സർവേ നിനേശുർ ഇതി നഃ ശ്രുതം
16 പുരൂരവാസ് തതോ വിദ്വാൻ ഇലായാം സമപദ്യത
സാ വൈ തസ്യാഭവൻ മാതാ പിതാ ചേതി ഹി നഃ ശ്രുതം
17 ത്രയോദശ സമുദ്രസ്യ ദ്വീപാൻ അശ്നൻ പുരൂരവാഃ
അമാനുഷൈർ വൃതഃ സത്ത്വൈർ മാനുഷഃ സൻ മഹായശാഃ
18 വിപ്രൈഃ സ വിഗ്രഹം ചക്രേ വീര്യോന്മത്തഃ പുരൂരവാഃ
ജഹാര ച സ വിപ്രാണാം രത്നാന്യ് ഉത്ക്രോശതാം അപി
19 സനത്കുമാരസ് തം രാജൻ ബ്രഹ്മലോകാദ് ഉപേത്യ ഹ
അനുദർശയാം തതശ് ചക്രേ പ്രത്യഗൃഹ്ണാൻ ന ചാപ്യ് അസൗ
20 തതോ മഹർഷിഭിഃ ക്രുദ്ധൈഃ ശപ്തഃ സദ്യോ വ്യനശ്യത
ലോഭാന്വിതോ മദബലാൻ നഷ്ടസഞ്ജ്ഞോ നരാധിപഃ
21 സ ഹി ഗന്ധർവലോകസ്ഥ ഉർവശ്യാ സഹിതോ വിരാട്
ആനിനായ ക്രിയാർഥേ ഽഗ്നീൻ യഥാവദ് വിഹിതാംസ് ത്രിധാ
22 ഷട് പുത്രാ ജജ്ഞിരേ ഽഥൈലാദ് ആയുർ ധീമാൻ അമാവസുഃ
ദൃഢായുശ് ച വനായുശ് ച ശ്രുതായുശ് ചോർവശീ സുതാഃ
23 നഹുഷം വൃദ്ധശർമാണം രജിം രംഭം അനേനസം
സ്വർ ഭാവനീ സുതാൻ ഏതാൻ ആയോഃ പുത്രാൻ പ്രചക്ഷതേ
24 ആയുഷോ നഹുഷഃ പുത്രോ ധീമാൻ സത്യപരാക്രമഃ
രാജ്യം ശശാസ സുമഹദ് ധർമേണ പൃഥിവീപതിഃ
25 പിതൄൻ ദേവാൻ ഋഷീൻ വിപ്രാൻ ഗന്ധർവോരഗരാക്ഷസാൻ
നഹുഷഃ പാലയാം ആസ ബ്രഹ്മക്ഷത്രം അഥോ വിശഃ
26 സ ഹത്വാ ദസ്യു സംഘാതാൻ ഋഷീൻ കരം അദാപയത്
പശുവച് ചൈവ താൻ പൃഷ്ഠേ വാഹയാം ആസ വീര്യവാൻ
27 കാരയാം ആസ ചേന്ദ്രത്വം അഭിഭൂയ ദിവൗകസഃ
തേജസാ തപസാ ചൈവ വിക്രമേണൗജസാ തഥാ
28 യതിം യയാതിം സംയാതിം ആയാതിം പാഞ്ചം ഉദ്ധവം
നഹുഷോ ജനയാം ആസ ഷട് പുത്രാൻ പ്രിയവാസസി
29 യയാതിർ നാഹുഷഃ സമ്രാഡ് ആസീത് സത്യപരാക്രമഃ
സ പാലയാം ആസ മഹീം ഈജേ ച വിവിധൈഃ സവൈഃ
30 അതിശക്ത്യാ പിതൄൻ അർചൻ ദേവാംശ് ച പ്രയതഃ സദാ
അന്വഗൃഹ്ണാത് പ്രജാഃ സർവാ യയാതിർ അപരാജിതഃ
31 തസ്യ പുത്രാ മഹേഷ്വാസാഃ സർവൈഃ സമുദിതാ ഗുണൈഃ
ദേവ യാന്യാം മഹാരാജ ശർമിഷ്ഠായാം ച ജജ്ഞിരേ
32 ദേവ യാന്യാം അജായേതാം യദുസ് തുർവസുർ ഏവ ച
ദ്രുഹ്യുശ് ചാനുശ് ച പൂരുശ് ച ശർമിഷ്ഠായാം പ്രജജ്ഞിരേ
33 സ ശാശ്വതീഃ സമാ രാജൻ പ്രജാ ധർമേണ പാലയൻ
ജരാം ആർഛൻ മഹാഘോരാം നാഹുഷോ രൂപനാശിനീം
34 ജരാഭിഭൂതഃ പുത്രാൻ സ രാജാ വചനം അബ്രവീത്
യദും പൂരും തുർവസും ച ദ്രുഹ്യും ചാനും ച ഭാരത
35 യൗവനേന ചരൻ കാമാൻ യുവാ യുവതിഭിഃ സഹ
വിഹർതും അഹം ഇച്ഛാമി സാഹ്യം കുരുത പുത്രകാഃ
36 തം പുത്രോ ദേവയാനേയഃ പൂർവജോ യദുർ അബ്രവീത്
കിം കാര്യം ഭവതഃ കാര്യം അസ്മാഭിർ യൗവനേന ച
37 യയാതിർ അബ്രവീത് തം വൈ ജരാ മേ പ്രതിഗൃഹ്യതാം
യൗവനേന ത്വദീയേന ചരേയം വിഷയാൻ അഹം
38 യജതോ ദീർഘസത്രൈർ മേ ശാപാച് ചോശനസോ മുനേഃ
കാമാർഥഃ പരിഹീണോ മേ തപ്യേ ഽഹം തേന പുത്രകാഃ
39 മാമകേന ശരീരേണ രാജ്യം ഏകഃ പ്രശാസ്തു വഃ
അഹം തന്വാഭിനവയാ യുവാ കാമാൻ അവാപ്നുയാം
40 ന തേ തസ്യ പ്രത്യഗൃഹ്ണൻ യദുപ്രഭൃതയോ ജരാം
തം അബ്രവീത് തതഃ പൂരുഃ കനീയാൻ സത്യവിക്രമഃ
41 രാജംശ് ചരാഭിനവയാ തന്വാ യൗവനഗോചരഃ
അഹം ജരാം സമാസ്ഥായ രാജ്യേ സ്ഥാസ്യാമി ത ആജ്ഞയാ
42 ഏവം ഉക്തഃ സ രാജർഷിർ തപോ വീര്യസമാശ്രയാത്
സഞ്ചാരയാം ആസ ജരാം തദാ പുത്രേ മഹാത്മനി
43 പൗരവേണാഥ വയസാ രാജാ യൗവനം ആസ്ഥിതഃ
യായാതേനാപി വയസാ രാജ്യം പൂരുർ അകാരയത്
44 തതോ വർഷസഹസ്രാന്തേ യയാതിർ അപരാജിതഃ
അതൃപ്ത ഏവ കാമാനാം പൂരും പുത്രം ഉവാച ഹ
45 ത്വയാ ദായാദവാൻ അസ്മി ത്വം മേ വംശകരഃ സുതഃ
പൗരവോ വംശ ഇതി തേ ഖ്യാതിം ലോകേ ഗമിഷ്യതി
46 തതഃ സ നൃപശാർദൂലഃ പൂരും രാജ്യേ ഽഭിഷിച്യ ച
കാലേന മഹതാ പശ്ചാത് കാലധർമം ഉപേയിവാൻ