മഹാഭാരതം മൂലം/ആദിപർവം/അധ്യായം209

മഹാഭാരതം മൂലം/ആദിപർവം
രചന:വ്യാസൻ
അധ്യായം 209

1 [വർഗ]
     തതോ വയം പ്രവ്യഥിതാഃ സർവാ ഭരതസത്തമ
     ആയാമ ശരണം വിപ്രം തം തപോധനം അച്യുതം
2 രൂപേണ വയസാ ചൈവ കന്ദർപേണ ച ദർപിതാഃ
     അയുക്തം കൃതവത്യഃ സ്മ ക്ഷന്തും അർഹസി നോ ദ്വിജ
3 ഏഷ ഏവ വധോ ഽസ്മാകം സുപര്യാപ്തസ് തപോധന
     യദ് വയം സംശിതാത്മാനം പ്രലോബ്ധും ത്വാം ഇഹാഗതാഃ
4 അവധ്യാസ് തു സ്ത്രിയഃ സൃഷ്ടാ മന്യന്തേ ധർമചിന്തകാഃ
     തസ്മാദ് ധർമേണ ധർമജ്ഞ നാസ്മാൻ ഹിംസിതും അർഹസി
5 സർവഭൂതേഷു ധർമജ്ഞ മൈത്രോ ബ്രാഹ്മണ ഉച്യതേ
     സത്യോ ഭവതു കല്യാണ ഏഷ വാദോ മനീഷിണാം
6 ശരണം ച പ്രപന്നാനാം ശിഷ്ടാഃ കുർവന്തി പാലനം
     ശരണം ത്വാം പ്രപന്നാഃ സ്മ തസ്മാത് ത്വം ക്ഷന്തും അർഹസി
7 [വൈ]
     ഏവം ഉക്തസ് തു ധർമാത്മാ ബ്രാഹ്മണഃ ശുഭകർമകൃത്
     പ്രസാദം കൃതവാൻ വീര രവിസോമസമപ്രഭഃ
8 [ബ്രാഹ്മണ]
     ശതം സഹസ്രം വിശ്വം ച സർവം അക്ഷയ വാചകം
     പരിമാണം ശതം ത്വ് ഏതൻ നൈതദ് അക്ഷയ വാചകം
9 യദാ ച വോ ഗ്രാഹഭൂതാ ഗൃഹ്ണന്തീഃ പുരുഷാഞ് ജലേ
     ഉത്കർഷതി ജലാത് കശ് ചിത് സ്ഥലം പുരുഷസത്തമഃ
10 തദാ യൂയം പുനഃ സർവാഃ സ്വരൂപം പ്രതിപത്സ്യഥ
    അനൃതം നോക്തപൂർവം മേ ഹസതാപി കദാ ചന
11 താനി സർവാണി തീർഥാനി ഇതഃ പ്രഭൃതി ചൈവ ഹ
    നാരീ തീർഥാനി നാമ്നേഹ ഖ്യാതിം യാസ്യന്തി സർവശഃ
    പുണ്യാനി ച ഭവിഷ്യന്തി പാവനാനി മനീഷിണാം
12 [വർഗ]
    തതോ ഽഭിവാദ്യ തം വിപ്രം കൃത്വാ ചൈവ പ്രദക്ഷിണം
    അചിന്തയാമോപസൃത്യ തസ്മാദ് ദേശാത് സുദുഃഖിതാഃ
13 ക്വ നു നാമ വയം സർവാഃ കാലേനാൽപേന തം നരം
    സമാഗച്ഛേമ യോ നസ് തദ് രൂപം ആപാദയേത് പുനഃ
14 താ വയം ചിന്തയിത്വൈവം മുഹൂർതാദ് ഇവ ഭാരത
    ദൃഷ്ടവത്യോ മഹാഭാഗം ദേവർഷിം ഉത നാരദം
15 സർവാ ഹൃഷ്ടാഃ സ്മ തം ദൃഷ്ട്വാ ദേവർഷിം അമിതദ്യുതിം
    അഭിവാദ്യ ച തം പാർഥ സ്ഥിതാഃ സ്മ വ്യഥിതാനനാഃ
16 സ നോ ഽപൃച്ഛദ് ദുഃഖമൂലം ഉക്തവത്യോ വയം ച തത്
    ശ്രുത്വാ തച് ച യഥാവൃത്തം ഇദം വചനം അബ്രവീത്
17 ദക്ഷിണേ സാഗരാനൂപേ പഞ്ച തീർഥാനി സന്തി വൈ
    പുണ്യാനി രമണീയാനി താനി ഗച്ഛത മാചിരം
18 തത്രാശു പുരുഷവ്യാഘ്രഃ പാണ്ഡവോ വോ ധനഞ്ജയഃ
    മോക്ഷയിഷ്യതി ശുദ്ധാത്മാ ദുഃഖാദ് അസ്മാൻ ന സംശയഃ
19 തസ്യ സർവാ വയം വീര ശ്രുത്വാ വാക്യം ഇഹാഗതാഃ
    തദ് ഇദം സത്യം ഏവാദ്യ മോക്ഷിതാഹം ത്വയാനഘ
20 ഏതാസ് തു മമ വൈ സഖ്യശ് ചതസ്രോ ഽന്യാ ജലേ സ്ഥിതാഃ
    കുരു കർമ ശുഭം വീര ഏതാഃ സർവാ വിമോക്ഷയ
21 [വൈ]
    തതസ് താഃ പാണ്ഡവശ്രേഷ്ഠഃ സർവാ ഏവ വിശാം പതേ
    തസ്മാച് ഛാപാദ് അദീനാത്മാ മോക്ഷയാം ആസ വീര്യവാൻ
22 ഉത്ഥായ ച ജലാത് തസ്മാത് പ്രതിലഭ്യ വപുഃ സ്വകം
    താസ് തദാപ്സരസോ രാജന്ന് അദൃശ്യന്ത യഥാ പുരാ
23 തീർഥാനി ശോധയിത്വാ തു തഥാനുജ്ഞായ താഃ പ്രഭുഃ
    ചിത്രാംഗദാം പുനർ ദ്രഷ്ടും മണലൂര പുരം യയൗ
24 തസ്യാം അജനയത് പുത്രം രാജാനം ബഭ്രു വാഹനം
    തം ദൃഷ്ട്വാ പാണ്ഡവോ രാജൻ ഗോകർണം അഭിതോ ഽഗമത്