മഹാഭാരതം മൂലം/ആദിപർവം/അധ്യായം156
| ←അധ്യായം155 | മഹാഭാരതം മൂലം/ആദിപർവം രചന: അധ്യായം 156 |
അധ്യായം157→ |
1 [വൈ]
ഏതച് ഛ്രുത്വാ തു കൗന്തേയാഃ ശല്യവിദ്ധാ ഇവാഭവൻ
സർവേ ചാസ്വസ്ഥ മനസോ ബഭൂവുസ് തേ മഹാരഥാഃ
2 തതഃ കുന്തീസുതാൻ ദൃഷ്ട്വാ വിഭ്രാന്താൻ ഗതചേതസഃ
യുധിഷ്ഠിരം ഉവാചേദം വചനം സത്യവാദിനീ
3 ചിരരാത്രോഷിതാഃ സ്മേഹ ബ്രാഹ്മണസ്യ നിവേശനേ
രമമാണാഃ പുരേ രമ്യേ ലബ്ധഭൈക്ഷാ യുധിഷ്ഠിര
4 യാനീഹ രമണീയാനി വനാന്യ് ഉപവനാനി ച
സർവാണി താനി ദൃഷ്ടാനി പുനഃ പുനർ അരിന്ദമ
5 പുനർ ദൃഷ്ടാനി താന്യ് ഏവ പ്രീണയന്തി ന നസ് തഥാ
ഭൈക്ഷം ച ന തഥാ വീര ലഭ്യതേ കുരുനന്ദന
6 തേ വയം സാധു പാഞ്ചാലാൻ ഗച്ഛാമ യദി മന്യസേ
അപൂർവ ദർശനം താത രമണീയം ഭവിഷ്യതി
7 സുഭിക്ഷാശ് ചൈവ പാഞ്ചാലാഃ ശ്രൂയന്തേ ശത്രുകർശന
യജ്ഞസേനശ് ച രാജാസൗ ബ്രഹ്മണ്യ ഇതി ശുശ്രുമഃ
8 ഏകത്ര ചിരവാസോ ഹി ക്ഷമോ ന ച മതോ മമ
തേ തത്ര സാധു ഗച്ഛാമോ യദി ത്വം പുത്ര മന്യസേ
9 [യ്]
ഭവത്യാ യൻ മതം കാര്യം തദ് അസ്മാകം പരം ഹിതം
അനുജാംസ് തു ന ജാനാമി ഗച്ഛേയുർ നേതി വാ പുനഃ
10 [വൈ]
തതഃ കുന്തീ ഭീമസേനം അർജുനം യമജൗ തഥാ
ഉവാച ഗമനം തേ ച തഥേത്യ് ഏവാബ്രുവംസ് തദാ
11 തത ആമന്ത്ര്യ തം വിപ്രം കുന്തീ രാജൻ സുതൈഃ സഹ
പ്രതസ്ഥേ നഗരീം രമ്യാം ദ്രുപദസ്യ മഹാത്മനഃ