ധൂമ്രലോചനവധം

ഷഷ്ഠോഽദ്ധ്യായഃ

ധൂമ്രലോചനവധഃ

ഋഷിരുവാച:- 1 ഇത്യാകർണ്യ വചോ ദേവ്യാഃ സ ദൂതോഽമർഷപൂരിതഃ സമാചഷ്ട സമാഗമ്യ ദൈത്യരാജായ വിസ്തരാത്	2
തസ്യ ദൂതസ്യ തദ്വാക്യ മാകർണ്യാസുരരാട്തതഃ സക്രോധഃ പ്രാഹ ദൈത്യാനാം അധിപം ധൂമ്രലോചനം	3
ഹേ ധൂമ്രലോചനാശു ത്വം സ്വസൈന്യപരിവാരിതഃ താമാനയ ബലാദ്ദുഷ്ടാം കേശകർഷണവിഹ്വലാം	4
തത്പരിത്രാണദഃ കശ്ചിദ്യദി വോത്തിഷ്ഠതേ പരഃ സ ഹന്തവ്യോഽമരോ വാഽപി യക്ഷോ ഗന്ധർവ്വ ഏവ വാ	5
ഋഷിരുവാച:- 6 തേനാജ്ഞപ്തസ്തതം ശീഘ്രം സ ദൈത്യോ ധൂമ്രലോചനഃ വൃതഃ ഷഷ്ട്യാ സഹസ്രാണാ മസുരാണാം ദ്രുതം യയൗ	7
സ ദൃഷ്ട്വാ താം തതോ ദേവീം തുഹിനാചലസംസ്ഥിതാം ജഗാദോച്ചൈഃ പ്രയാഹീതി മൂലം ശുംഭനിശുംഭയോഃ	8
ന ചേത് പ്രീത്യാഽദ്യ ഭഗവതീ മദ്ഭർത്താരമുപൈഷ്യതി തതോ ബലാന്നയാമ്യദ്യ കേശാകർഷണവിഹ്വലാം	9
ദേവ്യുവാച:- 10 ദൈത്യേശ്വരേണ പ്രഹിതോ ബലവാൻ ബലസംവൃതഃ ബലാന്നയസി മാമേവം തതഃ കിം തേ കരോമ്യഹം	11
ഋഷിരുവാച:-12 ഇത്യുക്തഃ സോഽഭ്യധാവത്താ മസുരോ ധൂമ്രലോചനഃ ഹുങ്കാരേണൈവ തം ഭസ്മം സാ ചകാരാംബികാ തതഃ	13
അഥ ക്രുദ്ധം മഹാസൈന്യ മസുരാണാം തഥാഽംബികാ വവർഷ സായകൈതീക്ഷ്ണൈ സ്തഥാ ശക്തിപരശ്വധൈഃ	14
തതോ ധുതസടഃ കോപാത് കൃത്വാ നാദം സുഭൈരവം പപാതാസുരസേനായാം സിംഹോ ദേവ്യാഃ സ്വവാഹനഃ	15
കാംശ്ചിത് കരപ്രഹാരേണ ദൈത്യാനാസ്യേന ചാപരാൻ ആക്രാന്ത്യാ ചാധരേണാന്യാൻ ജഘാന സ മഹാസുരാൻ	16
കേഷാം ചിത് പാടയാമാസ നഖൈഃ കോഷ്ഠാനി കേസരീ തഥാ തലപ്രഹാരേണ ശിരാംസി കൃതവാൻ പൃഥക്.	17
വിച്ഛിന്നാബാഹുശിരസഃ കൃതാത്സേന തഥാഽപരേ പപൌ ച രുധിരം കോഷ്ഠാ ദന്യേഷാം ധുതകേസരഃ	18
ക്ഷണേന തത്ബലം സർവം ക്ഷയം നീതം മഹാത്മനാ തേന കേസരിണാ ദേവ്യാ വാഹനേനാതികോപിനാ	19
ശ്രുത്വാ തമസുരം ദേവ്യാ നിഹതം ധൂമ്രലോചനം ബലം ച ക്ഷയിതം കൃത്സ്നം ദേവീകേസരിണാ തതഃ	20
ചുകോപ ദൈത്യാധിപതിഃ ശുംഭഃ പ്രസ്ഫുരിതാധരഃ ആജ്ഞാപയാമാസ ച തൌ ചണ്ഡമുണ്ഡൌ മഹാസുരൌ	21
ഹേ ചണ്ഡ ഹേ മുണ്ഡ ബലൈർ ബഹുഭിഃ പരിവാരിതൌ തത്ര ഗച്ഛത ഗത്വാ ച സമാനീയതാം ലഘു.	22
കേശേഷ്വാകൃഷ്യ ബദ്ധ്വാ വാ യദി വഃ സംശയോ യുധി. തദാശേഷായുധൈഃ സർവൈ രസുരൈർവ്വിനിഹന്യതാം	23
തസ്യാം ഹതായാം ദുഷ്ടായാം സിംഹേ ച വിനിപാതിതേ ശീഘ്രമാഗമ്യതാം ബദ്ധ്വാ ഗൃഹീത്വാ താമഥാംബികാം	24

ഇതി ശ്രീ മാർക്കണ്ഡേയപുരാണേ സാവർണ്ണികേ മന്വന്തരേ ദേവീമാഹാത്മ്യേ ധൂമ്രലോചനവധോ നാമ ഷഷ്ഠോഽദ്ധ്യായഃ

ഷഷ്ഠോധ്യായേ ഉവാച മന്ത്രാഃ 4, ശ്ലോകമന്ത്രാഃ 20, ആഹത്യ മന്ത്രാഃ 24,ആദിതഃ മന്ത്രാഃ 412