കർത്തനേ ഈ പകലിലെന്നെ നീ

കർത്തനേ ഈ പകലിലെന്നെ നീ രചന:പി.വി. തൊമ്മി

¹കർത്തനേയീപ്പകലിലെന്നെ നീ
കാവൽ ചെയ്തതതിമോദമായ്
ചേർത്തണച്ചു നിൻ പാദത്തിലായ-
തോർത്തടി പണിയുന്നു ഞാൻ

²പക്ഷികൾ കൂടണഞ്ഞുകൊണ്ടവ
നിർഭയമായ് വസിക്കും പോൽ
പക്ഷമോടെന്റെ രക്ഷകാ തവ
വക്ഷസിൽ അണഞ്ഞീടുന്നേൻ

³ഭൂതലെയുദിച്ചുയർന്ന സൂര്യ
ശോഭ പോയ് മറഞ്ഞീടുന്നു
നീതിസൂര്യനെ മോദമോടക-
താരിൽ നീ ഉദിക്കേണമേ

⁴കേശാദി പാദം സർവ്വവും ഭരി-
ച്ചീടേണം പരിശുദ്ധനേ
ദാസൻ നിൻ തിരുസന്നിധിയിൻപ്ര-
കാശത്തിൽ നടന്നീടുവാൻ

⁵നിദ്രയിൽ നിൻ ചിറകിൻ കീഴെന്നെ
ഭദ്രമായ് മറയ്ക്കേണമേ
രാത്രി മുഴുവൻ ആവിയാലെന്നെ
ശത്രുവിൽ നിന്നും കാക്കുകേ

⁶രാത്രിയിൽ ഞാൻ കിടക്കയിൽ പ്രാണ-
നാഥനേ! വേദവാക്യങ്ങൾ
ഓർത്തു ധ്യാനിച്ചു മോദമായ് പ്രാർത്ഥി-
 ച്ചീടുവാൻ കൃപ നൽകുകേ-

⁷പ്രാണനായകനേശുവേ നീയീ
രാത്രിയിൽ എഴുന്നള്ളിയാൽ
ആനന്ദത്തോടെ ദാസനും എതി-
രേൽക്കുവാൻ തുണക്കേണമേ

⁸ഇന്നു രാത്രിയിൽ എന്റെ ജീവനെ
നീ എടുത്തീടുകിൽ വിഭോ
നിന്നിൽ ഞാൻ നിദ്രകൊണ്ടു വിശ്രമി-
ച്ചീടുവാൻ കൃപനൽകണേ