കവചസ്തോത്രം

അഥ ദേവീകവചം അസ്യ ശ്രീ ചണ്ഡികാകവചസ്യ,
ബ്രഹ്മാ ഋഷിഃ, അനുഷ്ടുപ്പ് ഛന്ദഃ,
അംഗന്യാസോക്തമാതരോ ബീജം,
ദിഗ്ബന്ധദേവതാസ്തത്വം,
ശ്രീ ത്രിഗുണാദേവീ പ്രീത്യർത്ഥം ജപേ വിനിയോഗഃ

ഓം നമശ്ചണ്ഡികായൈ

മാർക്കണ്ഡേയ ഉവാച:

യദ്ഗുഹ്യം പരമം ലോകേ സർവ്വ രക്ഷാകരം നൃണാം

യന്ന കസ്യചിദാഖ്യാതം തന്മേ ബ്രൂഹി പിതാമഹ. 1

ബ്രഹ്മോവാച:

അസ്തി ഗുഹ്യതമം വിപ്ര സർവ്വഭൂതോപകാരകം

ദേവ്യാസ്തു കവചം ദിവ്യം തച്ഛൃണുഷ്വ മഹാമുനേ. 2

പ്രഥമം ശൈലപുത്രീതി ദ്വിതീയം ബ്രഹ്മചാരിണീ

ത്രിതീയം ചന്ദ്രഘണ്ടേതി കൂശ്മാണ്ഡേതി ചതുർത്ഥകം. 3

പഞ്ചമം സ്കന്ദമാതേതി ഷഷ്ഠം കാത്യായനീതി ച

സപ്തമം കാളരാത്രീതി മഹാഗൗരീതി ചാഷ്ടമം. 4

നവമം സിദ്ധിതാ പ്രോക്താ നവദുർഗ്ഗാഃ പ്രകീർത്തിതാഃ

ഉക്താന്യേതാനി നാമാനി ബ്രഹ്മണൈവ മഹാത്മനാ. 5

അഗ്നിനാ ദഹ്യമാനസ്തു ശത്രുമദ്ധ്യേ ഗതോ രണേ

വിഷമേ ദുർഗ്ഗമേ ചൈവ ഭയാർത്താഃ ശരണം ഗതാഃ. 6

ന തേഷാം ജായതേ കിഞ്ചിദശുഭം രണസങ്കടേ

നാപദം തസ്യ പശ്യാമി ശോകദുഃഖഭയം നഹി. 7

യൈസ്തു ഭക്ത്യാ സ്മൃതാ നൂനം തേഷാം വൃദ്ധിഃ പ്രജായതേ

യേ ത്വാം ദേവേശീ രക്ഷസേ താന്ന സംശയഃ. 8

പ്രേതസംസ്താ തു ചാമുണ്ഡാ വരാഹീ മഹിഷാസനാ

ഐന്ദ്രീ ഗജസമാരൂഢാ വൈഷ്ണവീ ഗരുഡാസനാ. 9

മാഹേശ്വരീ വൃഷാരൂഢാ കൌമാരീ ശിഖിവാഹനാ

ലക്ഷ്മീഃ പദ്മാസനാ ദേവീ പദ്മഹസ്താ ഹരിപ്രിയാ. 10

ശ്വേതരൂപധരാ ദേവീ ഈശ്വരീ വൃഷവാഹനാ

ബ്രാഹ്മീ ഹംസ സമാരൂഢാ സർവ്വാഭരണഭൂഷിതാഃ. 11

ഇത്യേതാ മാതരഃ സർവ്വാഃ സർവ്വയോഗസമന്വിതാ

നാനാഭരണശോഭാഢ്യാ നനാരത്നോപശോഭിതാഃ. 12

ദൃശ്യന്തേ രഥമാരൂഢാ ദേവ്യഃ ക്രോധസമാകുലാഃ

ശംഖം ചക്രം ഗദാം ശക്തിം ഹലം ച മുസലായുധം. 13

ഖേടകം തോമരം ചൈവ പരശും പാശമേവ ച

കുന്തായുധം ത്രിശൂലഞ്ച ശാർങ്ങ്ഗമായുധമുത്തമം. 14

ദൈത്യാനാം ദേഹനാശായ ഭക്താനാമഭയായ ച

ധാരന്ത്യായുധാനീത്ഥം ദേവാനാം ച ഹിതായ വൈ. 15

നമസ്തേഽസ്തു മഹാരൌദ്രേ മഹാഘോരപരാക്രമേ

മഹാബലേ മഹോത്സാഹേ മഹാഭയവിനാശിനി. 16

ത്രാഹി മാം ദേവി ദുഷ്പ്രേക്ഷ്യേ ശത്രൂണാം ഭയവർദ്ധിനി

പ്രാച്യാം രക്ഷതു മാമൈന്ദ്രീ ആഗ്നേയാമഗ്നിദേവതാ. 17

ദക്ഷിണേഽവതു വാരാഹീ നൈഋത്യാം ഖഡ്ഗധാരിണീ

പ്രതീച്യാം വാരുണീ രക്ഷേത് വായവ്യാം മൃഗവാഹിനീ. 18

ഉദീച്യാം പാതു കൗബേരീ ഐശാന്യാം ശൂലധാരിണീ

ഊർദ്ധ്വം ബ്രഹ്മാണി മേ രക്ഷാധതസ്താത് വൈഷ്ണവീ തഥാ. 19

ഏവം ദശദിശോ രക്ഷേച്ചാമുണ്ഡാ ശവവാഹനാ

ജയാ മേ ചാഗ്രതഃ പാതു വിജയാ പാതു പൃഷ്ഠ്തഃ. 20

അജിതാ വാമപാർശ്വേ തു ദക്ഷിണേ ചാപരാജിതാ

ശിഖാമുദ്യോദിനീ രക്ഷേദുമാ മൂർദ്ധ്നി വ്യവസ്ഥിതാ. 21

മലാധരീ ലലാടേ ച ഭ്രുവൗ രക്ഷേദ് യശസ്വിനീ

ത്രിനേത്രാ ച ഭ്രുവോർമദ്ധ്യേ യമഘണ്ഡാ ച നാസികേ. 22

ശംഖിനീ ചക്ഷുഷോർമദ്ധ്യേ ശ്രോത്രയോർ ദ്വാരവാസിനീ

കപോലൗ കാളികാ രക്ഷേത് കർണ്ണമൂലേ തു ശങ്കരീ. 23

നാസികായാം സുഗന്ധാ ച ഉത്തരോഷ്ഠേ ച ചർച്ചികാ

അധരേ ചാമൃതകലാ ജിഹ്വയാം ച സരസ്വതീ. 24

ദന്താൻ രക്ഷതു കൗമാരീ കണ്ഠമദ്ധ്യേ തു ചണ്ഡികാ

ഘണ്ഡികാം ചിത്രഘണ്ടാ ച മഹാമായാ ച താലുകേ. 25

കമാക്ഷീ ചിബുകം രക്ഷേദ് വാചം മേ സർവ്വമംഗലാ

ഗ്രീവായാം ഭദ്രകാളീ ച പൃഷ്ഠവംശേ ധനുർധരീ. 26

നീലഗ്രീവാ ബഹിഃകണ്ഠേ നളികാം നളകൂബരീ

സ്കന്ധയോഃ ഖട്ഗിനീ രക്ഷേദ് ബാഹൂ മേ വജ്രധാരിണീ. 27

ഹസ്തയോർദണ്ഡിനീ രക്ഷേദംബികാ ചാംഗുലീഷു ച

നഖാഞ്ച്ഛൂലേശ്വരീ രക്ഷേദ് കുക്ഷൗ രക്ഷേത്കുളേശ്വരീ. 28

സ്തനൗ രക്ഷേന്മഹാദേവീ മനഃ ശോകവിനാശിനീ

ഹൃദയേ ലളിതാദേവീ ഉദരേ ശൂലധാരിണീ. 29

നാഭൗ ച കാമിനീ രക്ഷേദ് ഗുഹ്യം ഗുഹ്യേശ്വരീ തഥാ

പൂതനാ കാമികാ മേഢ്രം ഗുദേ മഹിഷവാഹിനീ. 30

കട്യാം ഭഗവതീ രക്ഷേജ്ജാനുനീ വിന്ധ്യവാസിനീ

ജംഘേ മഹാബലാ പ്രോക്താ ജാനുമദ്ധ്യേ വിനായകീ. 31

ഗുൽഫയോർ നാരസിംഹീ ച പാദപൃഷ്ഠേ തു തൈജസീ

പാദാങ്ഗുലീഷു ശ്രീ രക്ഷേത്പാദാധസ്ഥലവാസിനീ 32

നഖാൻ ദംഷ്ട്രാകരാളീ ച കേശാംശ്ചൈവോർദ്ധ്വകേശിനീ

രോമകൂപേഷു കൌബേരീ ത്വചം വാഗീശ്വരീ തഥാ. 33

രക്തമജ്ജാവസാമാംസാന്യസ്ഥിമേദാംസി പാർവ്വതീ

ആന്ത്രാണി കാളരാത്രിശ്ച പിത്തം ച മുകുടേശ്വരീ. 34

പത്മാവതീ പത്മകോശേ കഫേ ചൂഡാമണിസ്തഥാ

ജ്വാലാമുഖീ നഖജ്വാലാമഭേദ്യാ സർവ്വസന്ധിഷു. 35

ശുക്രം ബ്രഹ്മാണീ മേ രക്ഷേച്ഛായാം ച്ഛത്രേശ്വരീ തഥാ

അഹങ്കാരം മനോ ബുദ്ധിം രക്ഷേന്മേ ധർമ്മധാരിണീ. 36

പ്രാണാപാനൗ തഥാ വ്യാനമുദാനം ച സമാനകം

വജ്രഹസ്താ ച മേ രക്ഷേത്പ്രാണം കല്യാണശോഭനാ. 37

രസേ രൂപേ ച ഗന്ധേ ച ശബ്ദേ സ്പർശേ ച യോഗിനീ

സത്വം രജസ്തമശ്ചൈവ രക്ഷേന്നാരായണീ സദാ. 38

ആയൂ രക്ഷതു വാരാഹീ ധർമ്മം രക്ഷതു വൈഷ്ണവീ

യശഃ കീർത്തിം ച ലക്ഷ്മിം ച ധനം വിദ്യാം ച ചക്രിണീ. 39

ഗോത്രമിന്ദ്രാണി മേ രക്ഷേത്പശൂൻ മേ രക്ഷ ചണ്ഡികേ

പുത്രാൻ രക്ഷേന്മഹാലക്ഷ്മീർഭാര്യാം രക്ഷതു ഭൈരവീ. 40

പന്ഥാനം സുപഥാ രക്ഷേന്മാർഗ്ഗം ക്ഷേമകരീ തഥാ

രാജദ്വാരേ മഹാലക്ഷ്മീർവിജയാ സർവ്വതഃ സ്ഥിതാ. 41

രക്ഷാഹീനം തു യത് സ്ഥാനം വർജ്ജിതം കവചേന തു

തത്സർവ്വം രക്ഷ മേ ദേവീ ജയന്തീ പാപനാശിനീ. 42

പദമേകം ന ഗച്ഛേത് തു യദീച്ഛേച്ഛുഭമാത്മനഃ

കവചേനാവൃതോ നിത്യം യത്ര യത്രൈവ ഗച്ഛതി. 43

തത്ര തത്രാർത്ഥലാഭശ്ച വിജയഃ സർവ്വകാമികഃ

യം യം ചിന്തയതേ കാമം തം തം പ്രാപ്നോതി നിശ്ചിതം

പരമൈശ്വര്യമതുലം പ്രാപ്സ്യതേ ഭൂതലേ പുമാൻ. 44

നിർഭയോ ജായതേ മർത്യഃ സംഗ്രാമേഷ്വപരാജിതഃ

ത്രൈലൊക്യേ തു ഭവേത്പൂപൂജ്യഃ കവചേനാവൃതഃ പുമാൻ. 45

ഇദം തു ദേവ്യാഃ കവചം ദേവാനാമപി ദുർല്ലഭം

യഃ പഠേത്പ്രയതോ നിത്യം ത്രിസന്ധ്യം ശ്രദ്ധയാന്വിതഃ. 46

ദൈവീ കലാഭവേത്തസ്യ ത്രൈലോക്യേഷ്വപരാജിതഃ

ജീവേദ് വർഷശതം സാഗ്രമപമൃത്യുവിവർജ്ജിതഃ. 47

നശ്യന്തി വ്യാധയഃ സർവ്വേ ലൂതാവിസ്ഫോടകാദയ

സ്ഥാവരം ജംഗമം ചൈവ കൃത്രിമം ചാപി യദ്വിഷം. 48

അഭിചാരിണി സർവ്വാണി മന്ത്രയന്ത്രാണി ഭൂതലേ

ഭൂചരാഃ ഖേചരാശ്ചൈവ ജലജാശ്ചൗപദേശികാഃ. 49

സഹജാ കുലജാ മാലാ ഡാകിനീ ശാകിനീ തഥാ

അന്തരീക്ഷചരാ ഘോരാ ഡാകിന്യശ്ച മഹാബലാഃ. 50

ഗ്രഹഭൂതപിശാചാശ്ച യക്ഷഗന്ധർവ്വരാക്ഷസാഃ

ബ്രഹ്മരാക്ഷസവേതാളാ കൂശ്മാണ്ഡാ ഭൈരവാദയഃ. 51

നശ്യന്തി ദർശനാത്തസ്യ കവചേ ഹൃദിസംസ്ഥിതേ

മനോന്നതിർഭവേത് രാജ്ഞഃ തേജോവൃദ്ധികരം പരം. 52

യശസാ വർദ്ധതേ സോഽപി കീർത്തിമണ്ഡിതഭൂതലേ

ജപേത് സപ്തശതീം ചണ്ഡീം കൃത്വാ തു കവചം പുരാ. 53

യാവത്ഭൂമണ്ഡലം ധത്തേ സശൈലവനകാനനം

താവത് തിഷ്ഠതി മേദിന്യാം സന്തതിഃ പുത്രപൗത്രികീ. 54

ദേഹാന്തേ പരമം സ്ഥാനം യത് സുരൈരപി ദുർലഭം

പ്രാപ്നോതി പുരുഷോ നിത്യം മഹാമായാപ്രസാദതഃ. 55

പാർവ്വതീ പരമാ വിദ്യാ ബ്രഹ്മവിദ്യാപ്രദായിനീ

വിശേഷേണൈവ ജന്തൂനാം നാത്ര സന്ദേഹകാരണം

ലഭതേ പരമം രൂപം ശിവേന സഹമോദതേ. 56

ഓം

ഇതി ദേവ്യാഃ കവചം സമ്പൂർണം