മഹാഭാരതം മൂലം/ആദിപർവം/അധ്യായം76

മഹാഭാരതം മൂലം/ആദിപർവം
രചന:വ്യാസൻ
അധ്യായം 76

1 [വ്]
     അഥ ദീർഘസ്യ കാലസ്യ ദേവ യാനീ നൃപോത്തമ
     വനം തദ് ഏവ നിര്യാതാ ക്രീഡാർഥം വരവർണിനീ
2 തേന ദാസീ സഹസ്രേണ സാർധം ശർമിഷ്ഠയാ തദാ
     തം ഏവ ദേശം സമ്പ്രാപ്താ യഥാകാമം ചചാര സാ
     താഭിഃ സഖീഭിഃ സഹിതാ സർവാഭിർ മുദിതാ ഭൃശം
3 ക്രീഡന്ത്യോ ഽഭിരതാഃ സർവാഃ പിബന്ത്യോ മധുമാധവീം
     ഖാദന്ത്യോ വിവിധാൻ ഭക്ഷ്യാൻ വിദശന്ത്യഃ ഫലാനി ച
4 പുനശ് ച നാഹുഷോ രാജാ മൃഗലിപ്സുർ യദൃച്ഛയാ
     തം ഏവ ദേശം സമ്പ്രാപ്തോ ജലാർഥീ ശ്രമകർശിതഃ
5 ദദൃശേ ദേവ യാനീം ച ശർമിഷ്ഠാം താശ് ച യോഷിതഃ
     പിബന്തീർ ലലമാനാശ് ച ദിവ്യാഭരണഭൂഷിതാഃ
6 ഉപവിഷ്ടാം ച ദദൃശേ ദേവ യാനീം ശുചിസ്മിതാം
     രൂപേണാപ്രതിമാം താസാം സ്ത്രീണാം മധ്യേ വരാംഗനാം
     ശർമിഷ്ഠയാ സേവ്യമാനാം പാദസംവാഹനാദിഭിഃ
7 [യ്]
     ദ്വാഭ്യാം കന്യാ സഹസ്രാഭ്യാം ദ്വേ കന്യേ പരിവാരിതേ
     ഗോത്രേ ച നാമനീ ചൈവ ദ്വയോഃ പൃച്ഛാമി വാം അഹം
8 [ദേവ്]
     ആഖ്യാസ്യാമ്യ് അഹം ആദത്സ്വ വചനം മേ നരാധിപ
     ശുക്രോ നാമാസുരഗുരുഃ സുതാം ജാനീഹി തസ്യ മാം
9 ഇയം ച മേ സഖീ ദാസീ യത്രാഹം തത്ര ഗാമിനീ
     ദുഹിതാ ദാനവേന്ദ്രസ്യ ശർമിഷ്ഠാ വൃഷപർവണഃ
10 [യ്]
    കഥം നു തേ സഖീ ദാസീ കന്യേയം വരവർണിനീ
    അസുരേന്ദ്ര സുതാ സുഭ്രു പരം കൗതൂഹലം ഹി മേ
11 [ദേവ്]
    സർവ ഏവ നരവ്യാഘ്ര വിധാനം അനുവർതതേ
    വിധാനവിഹിതം മത്വാ മാ വിചിത്രാഃ കഥാഃ കൃഥാഃ
12 രാജവദ് രൂപവേഷൗ തേ ബ്രാഹ്മീം വാചം ബിഭർഷി ച
    കിംനാമാ ത്വം കുതശ് ചാസി കസ്യ പുത്രശ് ച ശംസ മേ
13 [യ്]
    ബ്രഹ്മചര്യേണ കൃത്സ്നോ മേ വേദഃ ശ്രുതിപഥം ഗതഃ
    രാജാഹം രാജപുത്രശ് ച യയാതിർ ഇതി വിശ്രുതഃ
14 [ദേവ്]
    കേനാസ്യ് അർഥേന നൃപതേ ഇമം ദേശം ഉപാഗതഃ
    ജിഘൃക്ഷുർ വാരിജം കിം ചിദ് അഥ വാ മൃഗലിപ്സയാ
15 [യ്]
    മൃഗലിപ്സുർ അഹം ഭദ്രേ പാനീയാർഥം ഉപാഗതഃ
    ബഹു ചാപ്യ് അനുയുക്തോ ഽസ്മി തൻ മാനുജ്ഞാതും അർഹസി
16 [ദേവ്]
    ദ്വാഭ്യാം കന്യാ സഹസ്രാഭ്യാം ദാസ്യാ ശർമിഷ്ഠയാ സഹ
    ത്വദധീനാസ്മി ഭദ്രം തേ സഖാ ഭർതാ ച മേ ഭവ
17 [യ്]
    വിദ്ധ്യ് ഔശനസി ഭദ്രം തേ ന ത്വാം അർഹോ ഽസ്മി ഭാമിനി
    അവിവാഹ്യാ ഹി രാജാനോ ദേവ യാനി പിതുസ് തവ
18 [ദേവ്]
    സംസൃഷ്ടം ബ്രഹ്മണാ ക്ഷത്രം ക്ഷത്രം ച ബ്രഹ്മ സംഹിതം
    ഋഷിശ് ച ഋഷിപുത്രശ് ച നാഹുഷാംഗ വദസ്വ മാം
19 [യ്]
    ഏകദേഹോദ്ഭവാ വർണാശ് ചത്വാരോ ഽപി വരാംഗനേ
    പൃഥഗ് ധർമാഃ പൃഥക് ശൗചാസ് തേഷാം തു ബ്രാഹ്മണോ വരഃ
20 [ദേവ്]
    പാണിധർമോ നാഹുഷായം ന പുംഭിഃ സേവിതഃ പുരാ
    തം മേ ത്വം അഗ്രഹീർ അഗ്രേ വൃണോമി ത്വാം അഹം തതഃ
21 കഥം നു മേ മനസ്വിന്യാഃ പാണിം അന്യഃ പുമാൻ സ്പൃശേത്
    ഗൃഹീതം ഋഷിപുത്രേണ സ്വയം വാപ്യ് ഋഷിണാ ത്വയാ
22 [യ്]
    ക്രുദ്ധാദ് ആശീവിഷാത് സർപാജ് ജ്വലനാത് സർവതോ മുഖാത്
    ദുരാധർഷതരോ വിപ്രഃ പുരുഷേണ വിജാനതാ
23 [ദേവ്]
    കഥം ആശീവിഷാത് സർപാജ് ജ്വലനാത് സർവതോ മുഖാത്
    ദുരാധർഷതരോ വിപ്ര ഇത്യ് ആത്ഥ പുരുഷർഷഭ
24 [യ്]
    ഏകം ആശീവിഷോ ഹന്തി ശസ്ത്രേണൈകശ് ച വധ്യതേ
    ഹന്തി വിപ്രഃ സരാഷ്ട്രാണി പുരാണ്യ് അപി ഹി കോപിതഃ
25 ദുരാധർഷതരോ വിപ്രസ് തസ്മാദ് ഭീരു മതോ മമ
    അതോ ഽദത്താം ച പിത്രാ ത്വാം ഭദ്രേ ന വിവഹാമ്യ് അഹം
26 [ദേവ്]
    ദത്താം വഹസ്വ പിത്രാ മാം ത്വം ഹി രാജൻ വൃതോ മയാ
    അയാചതോ ഭയം നാസ്തി ദത്താം ച പ്രതിഗൃഹ്ണതഃ
27 [വ്]
    ത്വരിതം ദേവ യാന്യാഥ പ്രേഷിതം പിതുർ ആത്മനഃ
    ശ്രുത്വൈവ ച സ രാജാനം ദർശയാം ആസ ഭാർഗവഃ
28 ദൃഷ്ട്വൈവ ചാഗതം ശുക്രം യയാതിഃ പൃഥിവീപതിഃ
    വവന്ദേ ബ്രാഹ്മണം കാവ്യം പ്രാഞ്ജലിഃ പ്രണതഃ സ്ഥിതഃ
29 [ദേവ്]
    രാജായം നാഹുഷസ് താത ദുർഗേ മേ പാണിം അഗ്രഹീത്
    നമസ് തേ ദേഹി മാം അസ്മൈ നാന്യം ലോകേ പതിം വൃണേ
30 [ഷു]
    വൃതോ ഽനയാ പതിർ വീര സുതയാ ത്വം മമേഷ്ടയാ
    ഗൃഹാണേമാം മയാ ദത്താം മഹിഷീം നഹുഷാത്മജ
31 [യ്]
    അധർമോ ന സ്പൃശേദ് ഏവം മഹാൻ മാം ഇഹ ഭാർഗവ
    വർണസങ്കരജോ ബ്രഹ്മന്ന് ഇതി ത്വാം പ്രവൃണോമ്യ് അഹം
32 [ഷു]
    അധർമാത് ത്വാം വിമുഞ്ചാമി വരയസ്വ യഥേപ്ഷിതം
    അസ്മിൻ വിവാഹേ മാ ഗ്ലാസീർ അഹം പാപം നുദാമി തേ
33 വഹസ്വ ഭാര്യാം ധർമേണ ദേവ യാനീം സുമധ്യമാം
    അനയാ സഹ സമ്പ്രീതിം അതുലാം സമവാപ്സ്യസി
34 ഇയം ചാപി കുമാരീ തേ ശർമിഷ്ഠാ വാർഷപർവണീ
    സമ്പൂജ്യാ സതതം രാജൻ മാ ചൈനാം ശയനേ ഹ്വയേഃ
35 [വ്]
    ഏവം ഉക്തോ യയാതിസ് തു ശുക്രം കൃത്വാ പ്രദക്ഷിണം
    ജഗാമ സ്വപുരം ഹൃഷ്ടോ അനുജ്ഞാതോ മഹാത്മനാ