മഹാഭാരതം മൂലം/ആദിപർവം/അധ്യായം63

മഹാഭാരതം മൂലം/ആദിപർവം
രചന:വ്യാസൻ
അധ്യായം 63

1 [വൈ]
     സ കദാ ചിൻ മഹാബാഹുഃ പ്രഭൂതബലവാഹനഃ
     വനം ജഗാമ ഗഹനം ഹയനാഗശതൈർ വൃതഃ
2 ഖഡ്ഗശക്തി ധരൈർ വീരൈർ ഗദാമുസലപാണിഭിഃ
     പ്രാസതോമര ഹസ്തൈശ് ച യയൗ യോധശതൈർ വൃതഃ
3 സിംഹനാദൈശ് ച യോധാനാം ശംഖദുന്ദുഭിനിസ്വനൈഃ
     രഥനേമി സ്വനൈശ് ചാപി സനാഗവരബൃംഹിതൈഃ
4 ഹേഷിതസ്വനമിശ്രൈശ് ച ക്ഷ്വേഡിതാസ്ഫോടിത സ്വനൈഃ
     ആസീത് കിലകിലാ ശബ്ദസ് തസ്മിൻ ഗച്ഛതി പാർഥിവേ
5 പ്രാസാദവരശൃംഗസ്ഥാഃ പരയാ നൃപ ശോഭയാ
     ദദൃശുസ് തം സ്ത്രിയസ് തത്ര ശൂരം ആത്മയശഃ കരം
6 ശക്രോപമം അമിത്രഘ്നം പരവാരണവാരണം
     പശ്യന്തഃ സ്ത്രീഗണാസ് തത്ര ശസ്ത്രപാണിം സ്മ മേനിരേ
7 അയം സ പുരുഷവ്യാഘ്രോ രണേ ഽദ്ഭുതപരാക്രമഃ
     യസ്യ ബാഹുബലം പ്രാപ്യ ന ഭവന്ത്യ് അസുഹൃദ്ഗണാഃ
8 ഇതി വാചോ ബ്രുവന്ത്യസ് താഃ സ്ത്രിയഃ പ്രേമ്ണാ നരാധിപം
     തുഷ്ടുവുഃ പുഷ്പവൃഷ്ടീശ് ച സസൃജുസ് തസ്യ മൂധനി
9 തത്ര തത്ര ച വിപ്രേന്ദ്രൈഃ സ്തൂയമാനഃ സമന്തതഃ
     നിര്യയൗ പരയാ പ്രീത്യാ വനം മൃഗജിഘാംസയാ
10 സുദൂരം അനുജഗ്മുസ് തം പൗരജാനപദാസ് തദാ
    ന്യവർതന്ത തതഃ പശ്ചാദ് അനുജ്ഞാതാ നൃപേണ ഹ
11 സുപർണപ്രതിമേനാഥ രഥേന വസുധാധിപഃ
    മഹീം ആപൂരയാം ആസ ഘോഷേണ ത്രിദിവം തഥാ
12 സ ഗച്ഛൻ ദദൃശേ ധീമാൻ നന്ദനപ്രതിമം വനം
    ബില്വാർക ഖദിരാകീർണം കപിത്ഥ ധവ സങ്കുലം
13 വിഷമം പർവത പ്രസ്ഥൈർ അശ്മഭിശ് ച സമാവൃതം
    നിർജലം നിർമനുഷ്യം ച ബഹുയോജനം ആയതം
    മൃഗസംഘൈർ വൃതം ഘോരൈർ അന്യൈശ് ചാപി വനേചരൈഃ
14 തദ് വനം മനുജവ്യാഘ്രഃ സഭൃത്യബലവാഹനഃ
    ലോഡയാം ആസ ദുഃഷന്തഃ സൂദയൻ വിവിധാൻ മൃഗാൻ
15 ബാണഗോചര സമ്പ്രാപ്താംസ് തത്ര വ്യാഘ്രഗണാൻ ബഹൂൻ
    പാതയാം ആസ ദുഃഷന്തോ നിർബിഭേദ ച സായകൈഃ
16 ദൂരസ്ഥാൻ സായകൈഃ കാംശ് ചിദ് അഭിനത് സ നരർഷഭഃ
    അഭ്യാശം ആഗതാംശ് ചാന്യാൻ ഖഡ്ഗേന നിരകൃന്തത
17 കാംശ് ചിദ് ഏണാൻ സ നിർജഘ്നേ ശക്ത്യാ ശക്തിമതാം വരഃ
    ഗദാ മണ്ഡലതത്ത്വജ്ഞശ് ചചാരാമിത വിക്രമഃ
18 തോമരൈർ അസിഭിശ് ചാപി ഗദാമുസലകർപണൈഃ
    ചചാര സ വിനിഘ്നൻ വൈ വന്യാംസ് തത്ര മൃഗദ്വിജാൻ
19 രാജ്ഞാ ചാദ്ഭുതവീര്യേണ യോധൈശ് ച സമരപ്രിയൈഃ
    ലോഡ്യമാനം മഹാരണ്യം തത്യജുശ് ച മഹാമൃഗാഃ
20 തത്ര വിദ്രുത സംഘാനി ഹതയൂഥപതീനി ച
    മൃഗയൂഥാന്യ് അഥൗത്സുക്യാച് ഛബ്ദം ചക്രുസ് തതസ് തതഃ
21 ശുഷ്കാം ചാപി നദീം ഗത്വാ ജലനൈരാശ്യ കർശിതാഃ
    വ്യായാമക്ലാന്തഹൃദയാഃ പതന്തി സ്മ വിചേതസഃ
22 ക്ഷുത്പിപാസാപരീതാശ് ച ശ്രാന്താശ് ച പതിതാ ഭുവി
    കേ ചിത് തത്ര നരവ്യാഘ്രൈർ അഭക്ഷ്യന്ത ബുഭുക്ഷിതൈഃ
23 കേ ചിദ് അഗ്നിം അഥോത്പാദ്യ സമിധ്യ ച വനേചരാഃ
    ഭക്ഷയന്തി സ്മ മാംസാനി പ്രകുട്യ വിധിവത് തദാ
24 തത്ര കേ ചിദ് ഗജാ മത്താ ബലിനഃ ശസ്ത്രവിക്ഷതാഃ
    സങ്കോച്യാഗ്ര കരാൻ ഭീതാഃ പ്രദ്രവന്തി സ്മ വേഗിതാഃ
25 ശകൃൻ മൂത്രം സൃജന്തശ് ച ക്ഷരന്തഃ ശോണിതം ബഹു
    വന്യാ ഗജവരാസ് തത്ര മമൃദുർ മനുജാൻ ബഹൂൻ
26 തദ് വനം ബലമേഘേന ശരധാരേണ സംവൃതം
    വ്യരോചൻ മഹിഷാകീർണം രാജ്ഞാ ഹതമഹാമൃഗം