ളമ്പി. ഒരു കുപ്പി തെളിഞ്ഞ ചെറുതേൻ കൊണ്ടുവന്നു് എല്ലാവരുടേയും മലർപ്പൊടിയിൽ കുറേശ്ശ ഒഴിച്ചുകൊടുത്തു. വീണ്ടും മുറിക്കകത്തു കടന്നു് കൂടകളിൽ സംഭരിച്ചുവച്ചിരുന്ന മധുരനാരങ്ങ, മാതളപ്പഴം ഇവയും കൊണ്ടു വന്നു് ഓരോന്നും എല്ലാവരുടേയും മുമ്പിൽ വച്ചിട്ട് ആശ്രമത്തിനു വെളിയിൽ ഇറങ്ങിപ്പോയി. കുറേക്കഴിഞ്ഞ് ചൂടുമാറിയിട്ടില്ലാത്ത പാലും കൊണ്ടുവന്നു് കാച്ചാതെതന്നെ പഞ്ചസാരയും ചേൎത്തു് എല്ലാവർക്കും ആവശ്യം പോലെ കൊടുത്തു. ഈ വിഭവപൂൎണ്ണമായ സൽക്കാരത്തിൽ അണ്ണാവിക്കും മറ്റുമുണ്ടായ സംതൃപ്തിയും ആനന്ദവും അനിർവചനീയമായിരുന്നു. സൽക്കാരത്തിനുപയോഗപ്പെടുത്തിയ വിഭവങ്ങളുടെ വൈശിഷ്ട്യത്തെക്കുറിച്ച് അണ്ണാവി ഭാൎയ്യയോടു ഇങ്ങനെ പ്രസംഗിച്ചു. തുടങ്ങി:--
"വലിയ പ്രഭുക്കന്മാരുടെ മന്ദിരങ്ങളിൽപ്പോലും ഇത്ര വിശിഷ്ടവിഭവങ്ങൾ മുൻകൂട്ടി കരുതിവയ്ക്കാതെ അതിഥികൾക്കു നൽകുന്നതിനു സാധിക്കുന്നതല്ല. ഇവിടെ ഉള്ളവർ അഞ്ചോ ആറോ പറയരാണു് ഇത്ര വളരെവിഭവങ്ങൾ ആശാനു വേണ്ടി കരുതി വയ്ക്കേണ്ട ആവശ്യവും ഇല്ല. പിന്നെയിതെല്ലാം നാം വന്നപ്പോൾ തയാറായിരുന്നതു എങ്ങനെയെന്നു എനിക്കു മനസ്സിലാകുന്നില്ല."
മീനാക്ഷിയമ്മ--“നാം ഇങ്ങോട്ടു വരുന്ന വിവരം ആശാൻ നേരത്തേ അറിഞ്ഞതാണല്ലോ. അതുകൊണ്ടു്, ആരെയോ അയച്ചു്. ആശാൻ ഇതൊക്കെഒരുക്കിവച്ചതായിരിക്കും. (തിരിഞ്ഞു, ആശാനോട്) അങ്ങനെയല്ലേ ആശാനേ?"
ആശാൻ--"ഇതെല്ലാം ഇവിടെത്തന്നെ ഉണ്ടാകുന്നതാണു്. പുറമെനിന്നും ഒന്നും വാങ്ങി ശേഖരിച്ചിട്ടില്ല."
