വിദ്യാഭ്യാസം
പരിഷത്ത് ഉണ്ടാക്കിയത് തന്നെ ബഹുജന വിദ്യാഭ്യാസത്തിനുവേണ്ടി ആയിരുന്നു. ജനങ്ങൾക്കിടയിൽ ശാസ്ത്രവിജ്ഞാനവും ശാസ്ത്രബോധവും പ്രചരിപ്പിക്കാൻ വേണ്ടിയായിരുന്നു. സ്ഥാപക അംഗങ്ങളിലും പിൽക്കാലത്ത് വന്ന പ്രവർത്തകരിലും ഏറ്റവും പ്രബലമായ വിഭാഗം അധ്യാപകരുടേതായിരുന്നു. ഇതൊക്കെക്കൊണ്ടുതന്നെയാണ് തുടക്കം മുതലേ വിദ്യാഭ്യാസം പരിഷത്തിന്റെ പ്രധാന അജണ്ടയായിത്തീർന്നതും.
1966ൽ NCERT പുതിയ പാഠ്യപദ്ധതി ആവിഷ്കരിച്ചപ്പോൾ അതിനോടു പ്രതികരിച്ചുകൊണ്ടാണ് പരിഷത്ത് ഔപചാരിക വിദ്യാഭ്യാസമേഖലയിൽ പ്രവേശിക്കുന്നത്. എന്നാൽ, നാമമാത്രമായ ഒരു പ്രവർത്തനമായിരുന്നു അത്. 1967ൽ ഭരണഘടന അംഗീകരിക്കുകയും വ്യക്തമായ കർമപരിപാടികൾ ആസൂത്രണം ചെയ്യുകയും വളരാൻ തീരുമാനിക്കുകയും ചെയ്തതോടുകൂടി മാത്രമാണ് പരിഷത്ത് ഒരു സംഘടനപോലും ആയിത്തീരുന്നത്. 1969 സമ്മർ വെക്കേഷൻ കാലത്ത് പരീക്ഷണാർഥം തൃശ്ശൂരിൽ വച്ചു നടത്തിയ ശാസ്ത്രപോഷണ ക്ലാസ്സുകൾ ആയിരുന്നു വിദ്യാഭ്യാസമേഖലയിലെ തുടക്കപരിപാടി. അതിനെ ബ്രിഡ്ജ് കോഴ്സ്, പ്രി ടേസ്റ്റിങ് ക്ലാസ്സുകൾ എന്നൊക്കെ വിളിച്ചിരുന്നു. പത്താം ക്ലാസ്സ് പരീക്ഷ എഴുതിയ കുട്ടികൾക്ക്, പ്രീഡിഗ്രിയിലെ ശാസ്ത്രപാഠങ്ങൾ മുൻകൂട്ടി പരിചയപ്പെടുത്തുക, സ്കൂൾ-കോളേജ് ഷോക്ക് മയപ്പെടുത്തുക, താൻ പഠിക്കുന്ന പാഠഭാഗങ്ങൾ ശാസ്ത്രത്തിന്റെ ചക്രവാളങ്ങളുമായും സമൂഹത്തിന്റെ നിലനിൽപ്പുമായും എങ്ങനെയൊക്കെ ബന്ധപ്പെട്ടിരിക്കുന്നു എന്ന് തിരിച്ചറിവുണ്ടാക്കുക - ഇതൊക്കെ ആയിരുന്നു ലക്ഷ്യങ്ങൾ.
തൃശ്ശൂരിലെ സർക്കാർ ബോയ്സ് സ്കൂളിൽ വച്ചായിരുന്നു 10 ദിവസം നീണ്ടുനിന്ന ഈ കോഴ്സ് നടന്നത്. ഒരു ദിവസം സെന്റ് തോമസ് കോളേ
