താൾ:33A11415.pdf/11

വിക്കിഗ്രന്ഥശാല സംരംഭത്തിൽ നിന്ന്
Jump to navigation Jump to search
ഈ താളിൽ തെറ്റുതിരുത്തൽ വായന നടന്നിരിക്കുന്നു


പ്രസാധകക്കുറിപ്പ്

മലയാള ഭാഷയ്ക്ക് വിലപ്പെട്ട സംഭാവന നല്കിയ ഡോ. ഹെർമൻ
ഗുണ്ടർട്ടിന്റെ 100-ാം ചരമവാർഷികത്തോടനുബന്ധിച്ച് മലയാളത്തിൽ
പ്രസിദ്ധപ്പെടുത്തുന്ന ഗ്രന്ഥപരമ്പരയിൽ (HGS) അഞ്ചാമത്തെ
വാല്യമാണ് വജ്രസൂചി.

ഗുണ്ടർട്ട് കൃതികളിൽ ഏറ്റവും പ്രശസ്തിയാർജിച്ചിട്ടുള്ളത്
വ്യാകരണവും നിഘണ്ടുവുമാണ്. ഇവ കൂടാതെ അൻപതോളം മലയാള
കൃതികൾ അദ്ദേഹം രചിച്ചിട്ടുണ്ട്. ജർമൻ ഭാഷയിൽ അതിൽ കൂടുതലും.
കേരളചരിത്ര പഠനത്തിനും സാഹിത്യചരിത്രത്തിനും ഗുണ്ടർട്ട്
അമൂല്യമായ സംഭാവനകൾ നൽകിയിട്ടുണ്ട്.

ഈ പരമ്പരയിലെ ഒന്നാം ഘട്ടത്തിലെ വാല്യങ്ങളായ
നിഘണ്ടുവും വ്യാകരണവും ഗുണ്ടർട്ടിന്റെ ജീവചരിത്രവും 1991
ഒക്ടോബർ 7-ന് തിരുവനന്തപുരത്ത് പ്രകാശിപ്പിക്കുകയുണ്ടായി. രണ്ടാം
ഘട്ടത്തിലും മൂന്നു വാല്യങ്ങളുണ്ട്. കേരളോല്പത്തിയും മറ്റും,
വജ്രസൂചി, മലയാളം ബൈബിൾ. ഈ മൂന്നു വാല്യം 48 കൃതികൾ
ചേർത്തിട്ടുണ്ട്.

വജ്രസൂചിയിൽ ഗുണ്ടർട്ടിന്റെ മുപ്പതോളം കൃതികൾ
ഉൾപ്പെടുത്തിയിരിക്കുന്നു; ചിലത് പൂർണമായും മറ്റു ചിലവ
ഭാഗികമായും. ഒന്നാം ഭാഗത്തിൽ വജ്രസൂചി, നളചരിതസാരശോധന,
പൊലുകർപചരിത്രം, സന്മരണവിദ്യ, സഞ്ചാരിയുടെ പ്രയാണം,
പഴഞ്ചാൽമാല, മാനുഷഹൃദയം എന്നീ ഏഴെണ്ണം പൂർണമായി
ചേർത്തിട്ടുണ്ട്. രണ്ടാം ഭാഗത്തിൽ പതിനൊന്നു പുസ്തകങ്ങളിൽ നിന്നുള്ള
ഭാഗങ്ങളും. പ്രചാരണസ്വഭാവമുള്ള രചനകളാണ് വജ്രസൂചിയുടെ
ഉള്ളടക്കം.

ശതാബ്ദിയാഘോഷങ്ങൾക്കു തുടക്കം കുറിച്ചുകൊണ്ട്
ഗുണ്ടർട്ടിന്റെ പ്രമുഖ കർമരംഗമായിരുന്ന തലശ്ശേരിയിൽ 1992 ഏപ്രിൽ
25-ന് സംഘടിപ്പിക്കുന്ന ചടങ്ങിൽ പരമ്പരയിലെ ഈ മൂന്നു വാല്യങ്ങളും
പ്രകാശിപ്പിക്കുന്നു. ഇക്കാര്യത്തിൽ ഞങ്ങൾക്കു സഹകരണം നല്കിയ
ജർമനിയിലെ സാംസ്കാരിക സ്ഥാപനങ്ങളോട് ഞങ്ങൾ
കൃതജ്ഞരാണ്. ഒപ്പം പ്രശസ്ത ഇൻഡോളജിസ്റ്റും ശതാബ്ദിയാഘോഷ
ക്കമ്മറ്റിയുടെ കൺവീനറുമായ ഡോ. ആൽബ്രഷ്ട് ഫ്രൻസിനോടും
ഗ്രന്ഥപരമ്പരകൾക്കു സമഗ്രമായ പഠനം തയ്യാറാക്കിയ പ്രൊഫ.
സ്കറിയാ സക്കറിയയോടും നന്ദി പ്രകാശിപ്പിക്കുന്നു.

ഏപ്രിൽ 25, 1992

"https://ml.wikisource.org/w/index.php?title=താൾ:33A11415.pdf/11&oldid=199699" എന്ന താളിൽനിന്ന് ശേഖരിച്ചത്